Es cargador e chéganche DeCA de vinte transportistas: que fas
Se contratas transporte, o 5 de outubro non che trae un documento: tráeche vinte, ou douscentos, de mans distintas e en formatos distintos. E cunha parte da responsabilidade que moita xente non sabe que ten.
O primeiro: ti tamén respondes
O artigo 7 da Orden FOM/2861/2012, na redacción da Orden TRM/282/2026, reparte de quen é cada dato do documento. Como cargador contractual respondes dos apartados a), b), c), d) e h):
- Os teus propios datos: nome ou razón social, NIF e domicilio.
- Os datos do transportista —si, os seus: nome e NIF—.
- A orixe e o destino do envío.
- A natureza e o peso da mercadoría.
- As observacións, se as hai.
O apartado b) é o que máis sorprende. Respondes de que o NIF do transportista estea ben, porque es ti quen formaliza o documento. Non te podes escudar en que o encheu el.
O segundo: tamén tes que conservalos
A conservación do documento alcanza as dúas partes. Non abonda con que o garde o transportista: se mañá hai unha inspección ou unha reclamación, quen ten que poder amosar o documento daquel porte de hai oito meses es ti tamén.
E aí está o problema real dun cargador: os documentos non nacen na túa casa. Nacen en vinte casas distintas e chegan cando chegan.
As tres formas de organizalo, de peor a mellor
- Perseguilos por WhatsApp. Funciona con dous transportistas e rompe con dez. O día que necesites un concreto, será o que falte.
- Pedir que cos manden por correo. Mellor, pero segues dependendo de que cada un se lembre, e acabas cunha caixa de entrada como arquivo.
- Que che cheguen sós. Que o transportista poña o teu correo ao xerar o documento e este entre no teu arquivo sen que ninguén faga nada. É o que facemos nós: o transportista engade o correo do cargador —é opcional, o documento vale igual sen el— e o cargador ve e descarga todos os DeCA nos que figura, sen invitacións nin cruces de NIF.
Explicámolo enteiro, e é gratis, na páxina do cargador.
Dúas cousas que convén deixar faladas cos teus transportistas
- Quen xera o documento. A norma non o impón. Se o xeras ti, tes o control e a trazabilidade, e non dependes de que vinte persoas se lembren. Se o xeran eles, asegúrate de que os teus datos van ben —porque respondes deles—.
- Que pasa se subcontratan. Se o teu transportista lle pasa a carga a outro, o que aparece como transportista efectivo é o que a fai, e o cargador contractual pasa a ser o teu transportista. Contámolo en subcontratas un porte.
En resumo
- Respondes de cinco dos apartados do documento, incluídos os datos do transportista.
- Tamén che alcanza a conservación.
- O arquivo que funciona é o que se enche só.
- Xeralo ti é máis traballo e menos risco. Decídeo antes do 5 de outubro, non despois.